2026 жылғы 1 қаңтардан бастап Қазақстанда міндетті әлеуметтік медициналық сақтандыру (МӘМС) жарналарын есептеу және төлеу тәртібіне өзгерістер енгізілді. Жаңартылған бұйрық 13 қазанда қабылданғанымен, оның нормалары 2026 жылдың басынан бастап күшіне енді.

Негізгі жаңашылдықтардың бірі — төлеушілер тізімінің кеңеюі. МӘМС жүйесіне арнайы салық режимі бойынша жұмыс істейтін өзін-өзі жұмыспен қамтыған азаматтар енгізілді. Олар үшін жарналар қызмет көрсететін интернет-платформалардың, соның ішінде цифрлық сервистердің операторлары арқылы ұсталып отыр. Ал бұрын бірыңғай жиынтық төлем (БЖТ) төлеген жеке тұлғалар төлеушілер қатарынан шығарылды, себебі БЖТ 2024 жылдан бастап жойылған.

Сондай-ақ жарналарды есептеу үшін қабылданатын табыс лимиттері өзгерді. Жеке тұлғалар мен жеке кәсіпкерлер үшін ең жоғары табыс мөлшері ең төменгі жалақының 10 еселенген көлемінен 20 еселенген көлеміне дейін ұлғайтылды.