Уәлиханов аудандық ауруханасында Денсаулық мектебі аясындағы сабақтар жалғасып жатыр. Жұмыс аптасының әр күні жеке тақырыпқа арналады, ал сейсенбі күндері мамандар тұрғындарға қант диабеті туралы ақпарат береді.

Кезекті дәріс терапия бөлімшесінде өтіп, оған 11 адам қатысты. Қатысушыларға қант диабеті, оның дамуына әсер ететін негізгі қауіп факторлары, қандағы глюкоза деңгейін бақылаудың, дұрыс тамақтану мен дене белсенділігінің маңызы туралы айтылды.

Денсаулық жағдайын тұрақты бақылауға, дәрігердің ұсынымдарын сақтауға және тағайындалған дәрілік препараттарды дұрыс қабылдауға ерекше назар аударылды. Қатысушылар мамандарға өздерін қызықтырған сұрақтарын да қоя алды.

Ақпараттық-түсіндіру жұмыстары Денсаулық мектебіндегі сабақтармен ғана шектелмейді. Аурухана холдарында орнатылған экрандардан қант диабеті және аурулардың алдын алу мен денсаулықты сақтауға қатысты басқа да тақырыптар бойынша пайдалы ақпарат қамтылған бейнероликтер тұрақты түрде көрсетіледі.

Денсаулық мектебінің сабақтары жұмыс аптасы бойы жалғасады. Оларға ауданның барлық ниет білдірген тұрғындары қатыса алады.