Уәлиханов аудандық ауруханасының директоры міндетін атқарушы болып Әмірнияз Рүстем Азаматұлы тағайындалды.

Рүстем Азаматұлының жоғары медициналық білімі бар. 2016 жылы С.Д. Асфендияров атындағы Қазақ ұлттық медицина университетін «Жалпы медицина» мамандығы бойынша тәмамдаған.

Денсаулық сақтау саласындағы еңбек жолын Алматы қаласының жедел медициналық жәрдем қызметінде бастаған. Кейінгі жылдары Алматы қаласында, Қостанай облысында және еліміздің басқа да өңірлеріндегі медициналық ұйымдарда жалпы практика дәрігері болып жұмыс істеді. 2022–2024 жылдары Денисов аудандық ауруханасы емханасының меңгерушісі қызметін атқарды.

Оның кәсіби қызметі Уәлиханов аудандық ауруханасымен 2024 жылдан бері байланысты. Мұнда жалпы практика дәрігері болып жұмыс істеп, кейін ұйымдастыру-әдістемелік бөлімді басқарды. 2025 жылдың қыркүйегінен бастап директордың медициналық бөлім жөніндегі орынбасары қызметін атқарды.

Жинақтаған практикалық және басқарушылық тәжірибесі, алғашқы медициналық-санитариялық көмектің жұмысын және аудандық аурухананың ішкі үдерістерін жақсы білуі жаңа қызметтегі алдағы жұмысына берік негіз болмақ.

Рүстем Азаматұлына жаңа қызметінде табыс, кәсіби төзімділік және Уәлиханов ауданы тұрғындарының игілігі жолындағы жемісті еңбек тілейміз!